Ek dampati ne jab apni shadi ki 25vi varshganth manai to ek sthaniya samacharpatra ka samvaddata unka sakshatkar lene unke ghar ja pahuncha. Darasal we dampati apni shantipurna aur sukhmay vivahit jivan ke liye poore kasbe me prasidhe ho chuke the. unke beech kabhi koi taqrar nam matra ke liye bhi nahi hui. samvaddata unke sukhi jeevan ka raz janne ke liye utsuk tha.
Pati ne bataya-Hamari shadi ke fauran bad humlog honeymoon manane ke liye shimla gaye hue the. Wahan humlogon ne ghudsavari ki. Mera ghoda to theek tha par jis ghode par meri patni sawar thi, wah zara sa nakhrail tha. Usne daudte daudte achanak meri patni ko neeche gira diya. Patni ne ghode ki peeth par haath ferte hue kaha-yeh pehli bar hai. Aur phir usi ghode par sawar ho gayi. Thodi door chalne ke bad ghode ne phir use neeche gira diya. Patni ne ghode ki peeth par haath pherte hue kaha-ye doosri baar hai. Aur phir usi ghode par sawar ho gayi. Teesri baar jab ghode ne use neeche giraya to meri patni ne ghode se kuch nahi kaha, bas apne purse se pistol nikali aur ghode ko goli mar di. Main apni patni par chillaya- ye tumne kya kiya. Tumne ek bejubaan jaanvar ko mar diya...kya tum pagal ho gayi ho?
Patni ne meri taraf dekha aur kaha-ye pehli bar hai.
Aur bas, tabhi se hamari zindagi sukh aur shanti se chal rahi hai.
![[del.icio.us]](http://images.del.icio.us/static/img/delicious.small.gif){kind=small}
